திருப்பத்தூர் மாவட்டம் நாட்றம்பள்ளி வட்டாட்சியர் அலுவலகத்தில் நடைபெறும் பல்வேறு நிர்வாக குளறுபடிகளால் பொதுமக்கள் பெரிதும் பாதிக்கப்பட்டுள்ளனர். கடந்த சில நாட்களுக்கு முன்பாக இந்த அலுவலகத்தில் பணிபுரிந்த பூவிதா எனும் நில அளவையர் மீது 30 ஆயிரம் ரூபாய் லஞ்சப்புகார் எழுந்ததன் எதிரொலியாக தற்பொழுது இடமாற்றம் செய்யப்பட்டார். இந்நிலையில் கடந்த ஆறு மாதங்களுக்கு முன்பாகவே முதியோர் உதவித் தொகைக்கான ஆணை கிடைக்கப் பெற்றும் அதற்குரிய பயனாளர்களுக்கு உதவித்தொகை இன்னமும் சென்றடையவில்லை. முதியோர் உதவித் தொகைக்கான ஆணை கிடைக்கப் பெற்ற முதியோர்கள் கடந்த ஆறு மாதங்களாக காத்திருந்தும் உரிய பயனாளர்களுக்கு அதற்குரிய பலன் கிடைக்கப் பெறவில்லை. இந்நிலையில் பாதிக்கப்பட்ட முதியோர்கள் சம்பந்தப்பட்ட நாட்றம்பள்ளி சமூக நலத்துறை வட்டாட்சியர் திரு சம்பத் அவர்களிடம் கேள்வி எழுப்பிய போது, “நான் இந்த அலுவலகத்திற்கு வந்து ஒரு மாதம் தான் ஆகிறது. இதற்கு முன்பிருந்த துறை தாசில்தார், திருமதி பூங்கொடி அவர்கள்தான் இத்தவருக்கு காரணம். எனவே நீங்கள் மீண்டும் ஆன்லைனில் விண்ணப்பம் செய்யுங்கள். தகுதி இருப்பின் உங்களுக்கு முதியோர் உதவித் தொகைக்கான ஆணை வழங்குகிறேன்” என்று கூறுவதாக பாதிக்கப்பட்டவர்கள் தெரிவிக்கின்றனர். அப்படியெனில் பொறுப்பில் இருக்கும் அதிகாரிகள் வழங்கும் ஆணைகள் அப்பொறுப்பிலிருந்து இடமாறுதல் பெற்றவுடன் செயலிழந்து விடுமா?
ஏதுமறியாத முதியோர்கள் என்ன செய்வார்கள். ஏற்கனவே கிடைக்கப்பெற்ற ஆணைகள் அப்பொறுப்பில் இருக்கும் அதிகாரிகள் இடமாற்றம் அடைந்ததும் செல்லாததாகிவிடுமா? இதுபற்றி முன்பு சம்பந்தப்பட்ட பொறுப்பில் இருந்த திருமதி பூங்கொடி அவர்களிடம் தொடர்பு கொண்டு கேட்டபோது. அவர்கள் கூறியதாவது:
“நான் வழங்கிய அனுமதி ஆணைகளுக்கு திரு சம்பத் அவர்கள் வேண்டுமென்றே அனுமதி தர மறுக்கிறார்” என்று கூறினார். அப்படியானால் அதிகாரிகளுக்கிடையில் நடக்கும் காழ்ப்புணர்ச்சிகளுக்கு அப்பாவி பொதுமக்கள் பலிகடாவாகலாமா? இதற்கு உயர்திரு திருப்பத்தூர் மாவட் ஆட்சியர் அவர்கள் உரிய நடவடிக்கை எடுப்பாரா?
– S.மோகன்
