திருப்பத்தூர் மாவட்டம் நாட்றம்பள்ளி தாலுக்காவிற்குட்பட்ட ஆத்தூர்குப்பம் ஊராட்சிக்குட்பட்ட கூல்காரன் வட்டம் பகுதியில் சுமார் பதினைந்து குடும்பங்கள் வரை வாழ்ந்து வருகிறார்கள். இக்கிராமத்திற்கு செல்வதற்கு பொதுவழி ஒன்று உள்ளது. இதில் கடந்த நாற்பது ஆண்டுகளாக இப்பகுதி மக்கள் நடைபாதையாக பயன்படுத்தி வருகிறார்கள். இந்நிலையில் இதேபகுதியை சேர்ந்த அய்யாவு ராஜா போன்ற நபர்கள் இவ்வழியில் திடீரென்று இயந்திரங்கள் மூலம் தற்காலிகமாக குழிகளை ஏற்படுத்தி இது தங்களுடைய சொந்த இடத்தில் வருவதாகவும் இனி இதில் பயணிக்க முடியாது என்று கூறுவதாக போராட்டத்தில் ஈடுபட்ட பெண்கள் தெரிவித்தனர்.
போராட்டக்காரர்களிடம் ஆத்தூர்குப்பம் ஊராட்சி கிராம நிர்வாக அலுவலர் சமாதானம் பேச முயன்ற போது, அவருடன் போராட்டத்தில் ஈடுபட்டிருந்த பெண்கள் கடுமையான வாக்குவாதத்தில் ஈடுபட்டனர். மேலும் இதற்கு தீர்வு கிடைக்கும் வரை வட்டாட்சியர் அலுவலகத்தை விட்டு விலக மாட்டோம் என்று தெரிவித்தனர்.
அடிப்படை வசதிகளை ஏற்படுத்தி கொடுப்பதில் சம்பந்தப்பட்ட மாவட்ட நிர்வாகம் உடனடியாக நடவடிக்கை எடுத்து எங்களின் கோரிக்கையை நிறைவேற்றித் தரவேண்டும் என்றனர். போராட்டத்தால் நாட்றம்பள்ளி வட்டாட்சியர் அலுவலகத்தில் சிறிது நேரம் பரபரப்பு நிலவியது.
இந்நிலையில் நேற்றைய தினம் புதன்கிழமையன்று சம்பந்தப்பட்ட இருதரப்பையும் திருப்பத்தூர் சார் அலுவலகத்தில் வரவழைத்து தேர்தல் முடியும் வரை இருதரப்பும் அமைதி காக்கும்படியும் அதுவரை அவ்வழியிலேயே பயணம் செய்யும்படியும் கூறியாதாகவும் அதனை ஏற்றுக் கொண்டு இருதரப்பும் வந்தனர். இந்நிலையில் இன்று திடீரென மீண்டும் எதிர்தரப்பினர் அவ்வழியில் முட்களையும் மரங்களையும் வெட்டிப்போட்டு தடைகளை ஏற்படுத்தியுள்ளனர் என்றும் போராட்டக்காரர்கள் குற்றம்சாட்டினர்.
-S.Mohan
